كلام المصطبه … بدون طبطبه ولا فزلكه ولا حلفطه
***********************************
احبائى اعزائى فلزات اكبادى !!!!!!!!!!!!!!!!!
حكومة الطناش الوطنى هزرنا كتير ولعبنا كتير , شويه جد بقى, كفايه كده ها نقضى السنه كلها لعب ولا ايه .
واول الجد ياحبايبى استجواب لوزير ماليتكم وده مش استجواب من بتوع الحزب الوطنى اللى كان الخبير بيكلفته وينتقل لجدول الاعمال لا ده سؤال محرج للحكومه وللاغلبيه معا اما بالنسبه للحكومه ها نقلب فى الصفحات القديمه طبعا ويمكن نستفسر عن حجم الاموال التى اهدرت من اموال اصحاب المعاشات ودور كل رئيس حكومه فى الاهدار من اول على لطفى وعاطف والجنزورى وعبيد ونظيف وشفيق والجنزورى كمان مره ونشوف ونسمع ويعرف المصريين كلهم ان احنا ليس لنا دخل اطلاقا بعجلة الانتاج لاننا سلمنا العجله والمفاتيح للشعب بعد ما انتجنا وانتاجنا بالهنا والشفى اكلتوه وماعندناش صحه ننتج لكم تانى بالعربى يعنى احنا لينا عند الشعب المصرى قرشين وعايزينهم لان معظم العاملين فى الدوله اللى ليه فى الثوره واللى ما لهوش قيض كله قبض ما عدا مالك راس المال وصاحب المليارات اللى عمالين تهبشوا فيها وصاحب المال ده هو اللى مطنيشينه وياريت الطناش بينفع صاحبه لو كان بينفع كان نفع حسنى مبارك
وبالتوازى مع الاستجواب ها يكون الاعتصام علشان الفضيحه تبقى بجلاجل ويعرف العالم كله ان الحكومه اللى مالهاش خير فى كبارها ما لهاش خير فى ضغارها
اما بالنسبه لمجلس الشعب فليس امام الاعضاء الا موافقة البدرى فرغلى والتضامن معه فى استجوابه وليس امام الجميع اى خيار الا تحقيق الوعود التى قطعوها على انفسهم وصدقهم الناس وحصلوا على الكراسى ومش اى كراسى دى اغلبيه يابا . يعنى الوقت فى صالحنا والكره فى ملعب النواب وفى امكانهم تسجيل هدف فى الحكومه لان فى حالة الاخفاق سيهبط فريق الاغلبيه الى دورى المظاليم ويتنافس مع فريق بورتو طره .
الامل ها يتحقق سواء طنش الجنزورى ام لم يطنش . سواء كبر دماغه وترك المتظاهرين بدون حتى تصريح ولو جبران خاطر او كلمتين حلوين للمتظاهرين من عينة من عنينا ها نحقق مطالبكم وما نقدرش نهدر حقكم ده انتم اصحاب جمايل على الشعب ده انتم قدمتم السبت والاحد والاثنين والثلاث والاربع والخميس وسيبونا نقدم لكم الجمعه اهو نرد جزء من الجمايل … حتى الكلمتين الفاضيين دول ما فكرتوش تقولوهم وكأننا شىء اى شىء !!!!!!!!! نقول لحكومة الطناش الوطنى حان وقت الحساب ونقول لبرلمان ما بعد الثوره حان وقت الامتحان يوم يكرم المرء او يهان / حسين على حسن
النقابة العامة لأصحاب المعاشات 